С.Шаляев: «Налогонь декларациятнень эряви максомс шкастонзо»

Ушодовсь декларациянь кампаниясь. Эрицятнень талновты: кинень эряви пачтямс эсест доходост кувалма?, зярс мереви кандомс декларациятнень?, кодат полавтомат совавтовсть сынст сермадомантень?. Неть ды лия кевкстематнень кувалма кортынек Россиянь Федеральной налогонь службань МР-со Управлениянь прявтонть полавтыцянзо С.Н.Шаляев марто.

- Сергей Николаевич, евтнеде, кинень эряви максомс эсест доходост коряс декларация?

- Налогонь декларациятнень эряви анокстамс сеть ломантненень, конатне получасть доход улипаронь миеманть эйстэ. Те тееви сень пингстэ, бути недвижимостесь эли автомобилесь ульнесть сонзэ собственностьсэ колмо иеде аламо. Бути жо ломанесь ульнесь сынст азорокс колмо иеде ламо, сестэ сон олякстомтови истямо декларациянь максомадо. Доходост кувалма декларацият эряви максомс истя жо сеть ломантненень, конатне теить кодатак услугат: максыть арендас эрямо таркань эли производствань помещеният, гаражт, автомобильть, топавтыть репетиторонь тевть ды истя седе тов. Те – налогоньпандыцятнень пряви категориясь.

- Зряс мереви максомс декларациятнень?

- Эрицятненень 3-НДФЛ декларациятнень эряви кандомс эрямо таркань коряс маласо налогонь инспекциятнень тедедень апрелень 30-це чинть самс.

- Инескесть, евтынк декларациянь кампаниянь икелепелень итогтнень.

- Иеде иес кастыть максозь декларациятне, конатнень анокстыть налогонь пандыцятне. Истя, 2011 иестэнть максозельть 41 тыща  декларацият, 2012 иенть коряс эсест доходост коряс пачтясть уш малав 48 тыщат ломанть. Те корты эрицятнень содамочист касомадо. Седее ламо декларацият максовить социальной ды ули-паронь налогонь вычеттнэнь получамост коряс. Ламот эрицятне сермадыть декларацият сеть доходтнэнь коряс, конатне ютыть тенст эрямо таркань, транспортонь миемстэ, услугань явомсто (аренда, репетиторства). Налогонь пандыцятнень кассы чарькодемаст, секскак кассы декларациятнень ламочист.

- Мезе од совавтовсть декларациянь кампаниянтень?

- Тедеде налогонь службасонть ютавтовить пек ламо мероприятият. Неть читнестэ ветявсь «Панжадо кенкшень чи». Налогонь службань важодицятне евтнить пшкадицятненень тедедень декларациянь кампаниянь башка енкстнэде, лездыть видестэ сермадомс декларациянть. Истя жо тесэ мереви максомс питне налогонь службанть важодемань лезэвчинтень, те тееви «анкетирование» онлайн-сервисэнть вельде. Тесэ жо эрицятненень мереви евтамс мелест-арсемаст налогонь службанть важодеманзо кувалма, тешкстамс вадря енкстнэнь ды редямс асатыкстнэнь.

Декларациянь кампаниянть шкасто ютавтовить «пси линият». Ломантне пшкалить сынст талновтыця кевкстематнень марто. СМИ-тнесэ максови куля – зярс эряви пачтямс налогонь декларациятнень

- Пандовтови-арась штраф а шкастонзо налогонь декларациятнень максомаст кисэ?

- Эрицятнень кедьстэ, конат а шкастонзо максыть налогонь декларациятнень, пандовтови штраф, сехте аламо те 1000 целковойть. Те тешкстазь РФ-нь Налогонь кодексэнь 119.1 статьясонть.

- Сергей Николаевич, косто ломанентень мереви варштамс эсензэ долгонзо?

- Федеральной налогонь службаньсайстэ ули башка сервис, косо мереви варштамс улить-арасть ломаненть долгонзо. Истя, сайтсэнть тевс нолдазь «Личный кабинет налогоплательщика» сервисэсь, косо максозь куля пандозь налогтнеде, долгтнеде, кодамо движимой ди недвижимой ули-паро теевтезь ломаненть ланг, тестэ истя мереви саемс налогонь уведомленият, квитанцият, пшкадемс налогонь органтнэнень талоновтыця кевкстема март оды ламо лия мезе.

- Ков мереви пшкадемс налогонь декларациянь сермадомсто лезкс мельга?

- Мереви молемс эрямо таркань коряс маласо налогонь органонтень. Истя жо эрицятнень туртов, конат яволявтыть ули-паронь ды социальной вычеттнэнь коряс, ули «Декларационная кампания 2013» рубрика. Тесэ сермадозь, кодат документ эряви пурнамс ды ков сынст кандомс. Истя жо тесэ ули  «Декларация» электронной программа, конаннь вельде ломанесь стакачивтеме сермадсы те документэнть.

- Сергей Николаевич, зярдо мереви кандомс ули-паронь ды социальной вычетнэнь коряс декларациятнень?

- Апрелень 30-це чинть самс эряви кандомс декларациятнень сеть ломантненень конат 2012 иестэнть получасть доходт. Ули-паронь ды социальной вычеттнэнь коряс декларациятнень жо меэряви пшкадемс налогонь инспекциянтень документ марто, конатнесэ тешкстазь, тынь алкукс рамиде ули-паро. Тень коряс ютавтовить ванкшномат ды кемекстави решения неть ярмактнень пандомадо.