13 Республика Мордовия
Дата публикации: 25.04.2013
Издание: "Мокшень правда", 25 апреля 2013, №16
Тема: Декларационная кампания
Источник:
http://mokshen-pr.ru/
19 апрельста Саранскяяйса етась пресс-конференция РФ-нь Мордовия Республикать эзга федеральная Налоговай службань управлениянь руководительть заместителенц С.Н.Шаляевонь мархта.
Сон пачфтсь, што 2013 кизноб 1 январьста ушедсь декларационнай кампаниясь, кона моли тяддень 30 апрельти. Лама кизефкс журналисттне макссть социальнай налоговай вычеттнень получамаснон квалма. Оцю мяль штрафтфоль сянди, кие и кодама пингста должен максомс дохоттнень коряс декларациять.
Кода азозе Сергей Николаевич, што 3-НДФЛ-нь формань декларациятнень лувкссна кизоста кизос кассы. Тяддень васенце апрельти сась 26 тежяньда лама декларация, мезсь 1,2 сяда лама мелянь показательхнень коряс. Шарьхкодевиста пачфтезе, мзярда ломанти ули кода мрдафтомс налогть бюджетста: тя недвижимостень рамамста, ярмак лангс пчкафтомста и тонафнемста.
Налоговая службась старандай сяда пяк теждялгофтомас налогонь пандыхнень мархта работамать, сяс сон етафтови электроннай форматс. «Личный кабинет налогоплательщика для физических лиц» интернет-сервисть вельде ломанти ули кода содамс, аф якамок налоговай инспекцияв, налогообложениянь объекттнень, шумоть и налогонь вельф пандомать колга.
Аф кунара сервисть услуганза келемсть: тяни налогонь пандыхненди ули кода содамс максф налоговай декларациять кинц, ванф сон или аф, содамс проверкать шумордамань пингоц и стак тов.
Республиканскяй массовай информациянь средствань представительхненди макстольхть «Личный кабинет налогоплательщика для физических лиц» интернет-сервисонь Регистрационнай картат.